កម្មវិធីថែទាំសុខភាពភ្នែក ជូនដល់ ប្រជាជននៅខណ្ឌទួលគោក
នៅថ្ងៃទី២៣ ខែមករា យើងបានរៀបចំកម្មវិធីថែទាំសុខភាពភ្នែក ជូនដល់ប្រជាជននៅខណ្ឌទួលគោក រាជធានីភ្នំពេញនៅមណ្ឌលសុខភាពខណ្ឌទួលគោក។ កម្មវិធីផ្សព្វផ្សាយ អប់រំ អំពីរបៀប ថែទាំ សុខភាពភ្នែក និងការពិនិត្យព្យាបាលភ្នែកជូនដល់ប្រជាជននេះរៀបចំឡើងដើម្បីជាការចូលរួមចំណែក ជាមួយរាជរដ្ឋាភិបាល ក្នុងការលើកស្ទួយវិស័យសុខាភិបាលជាពិសេសផ្នែកចក្ខុនិងចង់ឱ្យប្រជាពលរដ្ឋខ្មែរមានសុខភាពភ្នែកល្អ។
ប្រជាពលរដ្ឋដែលមានបញ្ហាភ្នែករស់នៅក្នុងខណ្ឌ ទួលគោករាជធានីភ្នំពេញ បាន ទទួលការពិនិត្យភ្នែកដោយឥតគិតថ្លៃពីក្រុមគ្រូពេទ្យនៃមន្ទីរព្យាបាលភ្នែកហូសេងភ្នំពេញ។ ការពិនិត្យព្យាបាលនេះមានរយៈពេលមួយថ្ងៃគឺថ្ងៃទី២៣ខែ មករានេះ នៅមណ្ឌលសុខភាពខណ្ឌទួលគោក។ការពិនិត្យចាប់ពីម៉ោង៨និង៣០នាទីព្រឹកដល់ម៉ោង៥ល្ងាច។
លោកវេជ្ជបណ្ឌិត ញ៉ិល វុធ អនុប្រធានមន្ទីរព្យាបាលភ្នែក ហូសេងភ្នំពេញបានឱ្យដឹងថា៖កម្មវិធីផ្សព្វផ្សាយ អប់រំ អំពីរបៀបថែទាំ សុខភាពភ្នែកនិងការពិនិត្យព្យាបាលភ្នែកជូនដល់ប្រជាជននេះគឺដើម្បីជាការចូលរួមចំណែកជាមួយរាជរដ្ឋាភិបាលក្នុងការលើកស្ទួយវិស័យសុខាភិបាលជាពិសេសផ្នែកចក្ខុនិងចង់ឱ្យប្រជាពលរដ្ឋខ្មែរមានសុខភាពភ្នែកល្អ។ លោកបានបន្ថែមថា៖នេះជាលើកទី១ ដែលមន្ទីរព្យាបាលភ្នែក ហូសេងភ្នំពេញបានពិនិត្យភ្នែក ព្យាបាលភ្នែកនិង ចែកវ៉ែនតា ជូនប្រជាពលរដ្ឋដោយមិនគិតថ្លៃដូចជាការថតបាតភ្នែក ថតសរសៃភ្នែក តាមរយៈម៉ាស៊ីនទំនើបៗនិងការផ្តល់ប្រឹក្សាពីការថែរក្សាភ្នែក។ លោកបានបញ្ជាក់ថា៖សកម្មភាពមនុស្សធម៌នេះ នឹងបន្តធ្វើដូច្នេះទៅដល់គ្រប់ខណ្ឌផ្សេង ៗទៀតនៅរាជធានីភ្នំពេញ ។
លោក យឹម ដេត ប្រធានការិយាល័យសុខាភិបាលស្រុកប្រតិបត្តិចតុមុខនិងតំណាងឱ្យមណ្ឌលសុខភាពខណ្ឌទួលគោក បានមានប្រសាសន៍ថា៖សកម្មភាពពិនិត្យព្យាបាលភ្នែកដោយឥតគិតថ្លៃនេះជាសកម្មភាពសប្បុរសធម៌មួយដែលអាចជួយដោះស្រាយជូនប្រជាពលរដ្ឋដែលមានបញ្ហាភ្នែក។ក្រៅពីពិនិត្យព្យាបាលភ្នែកក៏មានការអប់រំអំពីការថែរក្សាសុខភាពភ្នែកដល់ប្រជាពលរដ្ឋផងដែរ។លោកក៏បានថ្លែងអំណរគុណចំពោះទឹកចិត្តសប្បុរសរបស់ក្រុមគ្រូពេទ្យមន្ទីរព្យាបាលភ្នែកហូសេងភ្នំពេញដែលបានមកជួយប្រជាជន។
លោក ហួត រ័ត្ន អាយុ ៥២ឆ្នាំ ជាពលរដ្ឋនៅក្នុងខណ្ឌទួលគោក បានសម្តែងការរីករាយចំពោះការចុះពិនិត្យដោយឥតគិតថ្លៃរបស់ក្រុមគ្រូពេទ្យ ដោយភ្នែករបស់លោកធ្លាប់មានបញ្ហាពីមុនផង។ លោកថា៖« ភ្នែករបស់ខ្ញុំត្រូវថ្នាំផង និងព្រៀលមើលមិនច្បាស់មួយចំហៀង ហើយពេទ្យបានធ្វើការពិនិត្យជូន និងកំពុងរងចាំពិនិត្យបន្តទៀត ដើម្បីដឹងលទ្ធផល»។
លោកស្រី លឹម ទាង មកពីសង្កាត់ទួលទំពូង២ ខណ្ឌចំការមន រាជធានីភ្នំពេញ បានមកទទួលយកសេវាពិនិត្យភ្នែកនេះដោយឥតគិតថ្លៃ ដោយទទួលបានដំណឹងនេះពីប្រធានភូមិរបស់លោកស្រីផ្ទាល់។ លោកស្រីបន្តថា៖« ខ្ញុំមកនេះគឺបំណងមើលភ្នែកនេះហើយ ព្រោះភ្នែករបស់ខ្ញុំឡើយបាយរយៈពេលប្រហែល ២ឆ្នាំមកនេះ ហើយមានអារម្មណ៍សប្បាយចិត្តដែលមានគេចុះមកពិនិត្យភ្នែកដោយមិនគិតថ្លៃបែបនេះ»។
កម្មវិធីថែទាំសុខភាពភ្នែក ដែលធ្វើឡើងដោយមន្ទីរព្យាបាលភ្នែក ហូសេង ភ្នំពេញនេះ ធ្វើឡើងនៅក្នុងមណ្ឌលសុខភាព ទួលគោកផ្ទាល់ ពិនិត្យដោយឧបករណ៍ពិនិត្យទំនើបៗ និងមិនគិតថ្លៃរយៈពេលមួយថ្ងៃពេញ ថែមទាំងមានផ្តល់ជាថ្នាំ និងវ៉ែនតាសម្រាប់អ្នកទៅពិនិត្យផងដែរ៕